طورطة سبونج بوب
تواصل تيزنيت 24 نشر إنتاجات ورشة الأمل لجمعية تحدي الإعاقة بتيزنيت، وفيما يلي وصفة جديدة من وصفات الورشة….
طورطة سبونج بوب
اليوم ان شاء الله غانشوفو طريقة اعداد طورطة سبونج بوب اللي هي شخصية كرتونية محببة لدى الاطفال واللي غلفناها بعجينة السكر
اولا غانحتاجو جينواز كبيرة طايبة فالاطة طولها 40 ستم والعرض 30 ستم وعالية شوية فالجوانب ب 5 ستم
المقادير:
8 بيضات
240 غ سنيدة
240 غ دقيق
2 خمارات
2 فاني
قشور حامضة محكوكين
الطريقة:
كنطربوا ابيض البيض حتى يبدا يطلع ونبقاو نزيدو السكر بشوية حتى يولي بحال الكريما ثم نزيدو الفاني وقشور الحامض واصفر البيض نخلطو غير شوية ونحبسو ا
نغربلوا الدقيق والخميرة ونزيدوه على الخليط مع الخلط غير بشوية حتى ينساجم نخويوه فالاطة مفرشة بورق سلفيريزي وندخلوها طيب ملي طيب نحيدو ليها الجناب بالموس ونقسموها من الوسط على 2 كنسقيو الجزء الاول بمشروب هاواي ونديرو طبقة من الشانتيي ونغطيو بالجينواز نسقيوها وندهنوها بطبقة رقيقة جدا من الشانتيي مانكتروش الكريما حيت غانغلفو الكيكة بعجينة السكر.
لتحضير عجينة السكر نحتاجو:
600 غ سكر كلاصي سبيسيال الخاص بالحلويات ماشي ديال العبار
1 ابيض البيض
2 معالق كبار كليكوز(كايتباع فسطيلات بحال العسل) او عسل ابيض مايكونش فيه اللون
3 اكياس فاني
كانخلطوا جميع المقادير حتى تجمع وندلكو وحنا كانزيدو السكر كلاصي حتى تجمع مزيان بحال الكرة وماتبقاش تلصق ناخدو جزء نخليوه جانبا والجزء الاخر نزيدو عليه ملون اصفر والى كاتلصق نزيدو السكر كلاصي
الجزء الاول نقسموه على 4
2 كانديروهوم صغار كنلونو واحد بالازرق والاخر بالاحمر
و2 الكبار واحد بالبني والاخر كايبقا ابيض
كنجمعو الكل فبلاستيكات باش ماينشفوش لينا كانطلقوا الاصفر فوق ورق الزبدة وحنا كنرشو بمايزينا على شكل رقيق ونقلبو الورق فوق الطورطة نحيدو الورق ونتبتو العجينة مزيان حتى تلصق ونحيدو الزوائد بالموس ونحتافظوا بيهوم فبلاستيكة نورقو العجين البني ونقطعو منو شريط ونلصقوه بحال الصورةكدلك العينين نقطعو 2 دوائر بالابيض و2 اصغر منهوم بالازرق و 2 اصغر بالبني والفم واللسان والانفونقطعو شريط ابيض للي هو القميص وربطة العنق بالاحمر والاسنان بالابيض نصايبو اليدين والرجلين بالعجينة للي بقات لينا ناخدو شوية من العجينة البنية نقطعوا منها شرائط رقاق بحال سباكيتي وندوروهوم على العينين وربطة العنق ونديرو بهوم الرموش ناخدو غلاقة ديال القرعة ونوركو بيها فوق العجين الاصفر باش يعطينا شكل دوائر للي محفرين فوق الطورطة وبالف هناء.
